Wis 16

a16.2Har 16.11-13, Dag 11.31-32

b16.5-7Dag 21.6-9

c16.20-29Har 16.1-36

1 Anidagua biyagome wali agali uruni tiha pani karulape mialu ema bialu piaga ko tara tara berearume pani mialu tandaga tara tara karulape mo mini.

2 Anigo Ngode Datagaliwabe-o í̠na wali agali í̠naga bu hearume mana ogoniale dege bialu hayaruhondo pani nelo namiriya. Ani nabi howa í̠naga bu miniha ti emene dambi ho howa ti tomo nelo ti heagoha egaru ibilariya. Tiha gari bilo kago biba helonaga tomo dendebiore miriya. ^a 3 Anigo wali agali í̠ni mitangi nahaga bu hearuhondo tomo dendebiore wiaguabi tomo garibi timbuni ho howa tomo nolenego mbira hame nalego miriya. Tigua hame nalego irane ti tomo nelonaga ema bialu piaga ko berearu tihondo miriya. Anigo í̠naga wali agali ti garibilo howa tigimandi hangu helowa tomo bayaleore abale miriya. 4 Heneneore í̠naga waitigi hearu pani nelo mialu hina gari timbuni mo miriya. Anigo í̠ninaga wali agali tihondo waitigi bu karu mana ogodagua bialu pani nelo miaga ko lalu mo walia hariya.

5 Ainde í̠naga wali agali bu heagoha nogombi ko wiaru mo ibilariya. Puya uruni ko gabuaore howa pedere bialu heneya. Ani bialu howa í̠naga wali agali bu hearu hayalu homelaga biyiya. Anigo í̠naga miniha keba holene lu wiaabo naheneya. ^b 6 Í̠naga wali agali tigua í̠ninaga manaore nga manda bilonaga pani emene tigimandi hanguni nelo mo miriya. Ani muwa mani ti mo karulape helo boronosime nogombi ale wabu ngelariya. 7 Mbirali nogombime hayaragola abale puwa nogombi ale wabu wiyago de handaya hayagua ogoni ibu homa nabi bayale haga biniya. Anigo ti biamogo binidagoni agalime nogombi wabu wiyadagome biamogo bini ndo. Í̠nime wali agali bibahende biamogo biriya. 8 Anidagua bialu í̠naga waitigi bu hearuhondo í̠na mbirale ko tara tara ibirago mo wahai holene karulapeore ko lalu ti mo walia hariya. 9 Pagayabi bunguna tawalina bedarubi ibalu waitigi wali agali biaru balu homelai helarigola ti biamogo bulene marasini mbira nawiore hene. Heneneore pagaya tawalina bedarubi ibilalu wali agali bo wahai harigo henemane tinaga ko biyagonaga pani mialu ibilariya. 10 Anigo nogombi biaru tigua í̠naga wali agaliru mo koore halu haya nabini. Í̠nime í̠naga wali agali dara howa biamogo bialu mo dabi haga biriya. 11 Í̠nime tihondo bi lamigi birigo mo mitangi bia holenaga nogombime hayilariya. Ani bialu í̠ha dara holene ngago tigua embeda nolenaga abale mo karulape helariya. 12 Ai ti mo bayale helayadagoni ira yuni irabuha hearu ariabi marasini ngarumebi ti mo dabi hene ndo. Anduane Homogo í̠naga bime wali agali bibahende mo dabi hene. 13 Wali agalinaga holenebi homolenebi í̠nime dege yu kegoni. Wali agali homeneru dalu humbirini andagaha hai hearia ti mo wialu haru dai biai hariya. 14 Agali ko mbira kagome mendeali kago homelo bo waholene karulape dege bolebirago ainde ibuninaga holene mo yu dai bulenego nakarulapeore. Ani bialu agali ogoninaga dinini humbirini andagaha pu kago haru dai bulene nakarulape ka.

Puriabu hongohebi ira hungulame wali agali bo wahai henego ogo

15 Wali agali mbirame í̠ helalu ibida pobe naheore kago 16 irane wali agali ko biaga bu karu tigua í̠ baya hangu handa nabi kagome bida. Ani kago manda bialu í̠na tihondo í̠naga hongo timbuni ngego mo walia halu tihondo tandaga holene timbuni mo miaga ke. Í̠na dalu dindiguni timbunimebi puriabu heba ira dene ibilalubi ti minu baga ke. Ani bialu irame wali agali ko biaga uruni bo wahai haga ke. 17 Ani bialu nahendene ale tara mbira tagira ibini. Ibame ira ba hundia nahene. Ibani ira hongo howa hundiabe nahe dayago irane hongo holene dindini wiaru damene bibahendeme wali agali bayale dindini bu hearu biamogo biyagola ira ibu ibani dene. 18 Horo mbiru howa ira ibugua ema bialu piaga wiaru Ngode Datagaliwabehanda wali agali ko hearu bo wahai hole ibilayaru bolino ibunaga hongo emene halu hundiale hene. Ani biyagola wali agali ko biaga bu hearu tigua mbirale uruni biyago hondowa tigua mitangi bialu Ngode Datagaliwabehanda tihondo ko birida lalu ti minu baore biyada lo manda bu hene. 19 Ani bialu mbirungi ira biago iba biradambi heago berelowa ira hongoheore dalu hene. Ani bialu ira ogonime wali agali ko hearunaga mabu hengearu bibahende dai hene.

Ngode Datagaliwabehanda Isaraele mena nelo minigo ogo

20 Wali agali ko biaga bu hearu genda emene ndo yu hayadagua í̠naga wali agali ti nayi dege hene. Ína ti tomo nelonaga dahuliyalinaga tomo wiago í̠naga wali agali ti nelo mo miriya. Í̠na dahuliya andaga tawe mberedi horo bibahendengi ibilalu haabo harigo ai mberedi dawa manda manda binigo nelo hangu mope hariliya. Mberedi ogoni dendebiroredagola wali agali tigua hame timbuniore laga hene. ^c 21 Tomo ogoni í̠ waneiginiru ti nelo miriyagome í̠na ti gubalini timbuniore ho ko lalu tini mo walia hariya. Ai mberedi ogoni wali agali bibahendeore nai halu no karulapelo manda bialu mirigola tigua nalu hearia dendego taraore wali agali bibahendeoreme dende hai halu nene. 22 Irame tomo ogoni dabe naheore halu dindiguni kerane hongohe ngago delaregola iba halu piagagobi winiya. Anigo irame waitigi wali agali mabuha tomo hengearu bibahende dai hayaya. Anidagua biyago í̠naga wali agali ti hondowa tigua manda bialu ira ogonime tinaga tomo mo ko halu da nabulubada lo manda bini. 23 Í̠na wali agali tigabi hearu ti tomo nolene milo manda bialu ira abale hongohe dayagobi ndo emene do dai bilariya.

24 Í̠na hongo tara tara holene dindini mo hela harigola bibahendeme í̠naga hame ngego taliai hagaya. Ai í̠naga hongo dindini wiyagome wali agali mana ko biaga karu pani nelo mialu bo wahaga biagaya. Ani bialu wali agali maru í̠naga hongo ngago yutiga bu kagohondo tinaga yutiga bu kago mo hongo holenaga í̠naga hongo ibu emene ibirahalu gedaore hagaya. 25 Anidagua dege horo ogoningi í̠naga hongo bibahende tara tarani iriari bialu í̠naga wali agaliru í̠ni olalu karuhondo biamogo bule ogodagua biruli lalu mo walia haga biriya. 26 Ani bialu í̠na í̠ waneigini hearu gubalini ho howa í̠na tihondo tomo mabuha hengene kagome ti mo hongo naholebira. Í̠naga bime dege wali agali í̠naga biamogo biaga ngego yutiga bu kago mo hongo haga lalu í̠naga wali agali mo walia halu tihondo lawai halu biriya. 27 Ai tomo maru irame nade wiaru nime daba hayagola do gedaore halu iba hayiya. 28 Anidagua biyadagome wali agalihondo ogodagua lawai hariya. Ni tagira naibidaore ti abale heyalu í̠nihondo ka̱i̱ ala lolene nga. Ani bialu gao naledaore í̠nihondo bi ala lolene nga lalu tihondo lawai hariya. 29 Wali agalime Ngode Datagaliwabehanda ti biamogo biaga ka lowa mini mbiraore wu howa ainde tigua ibunihondo ka̱i̱ nalayagua nde tinaga yutiga emene bu kago dindi guni ni daba haragola iba halu piagadagua ereba holebira lalu mo walia haya.